By హైదరాబాద్: మెగా ప్రిన్స్ వరుణ్ తేజ్ నటిస్తున్న తాజా చిత్రం ‘కొరియన్ కనకరాజు’ విడుదలకు సిద్ధమవుతోంది. మేర్లపాక గాంధీ దర్శకత్వంలో రూపొందుతున్న ఈ సినిమా ఆగస్టు 7న ప్రపంచవ్యాప్తంగా థియేటర్లలో విడుదల కానుంది. ఇప్పటికే విడుదలైన టీజర్ ప్రేక్షకుల్లో ఆసక్తిని పెంచగా, తాజాగా చిత్రబృందం మరో ప్రమోషనల్ అప్డేట్ను అందించింది.
సినిమాలోని ‘రసగుమ్మడి’ అనే మాస్ లవ్ సాంగ్ను మేకర్స్ విడుదల చేశారు. గ్రామీణ నేపథ్యంతో రూపొందిన ఈ పాటలో వరుణ్ తేజ్, హీరోయిన్ రితికా నాయక్ మధ్య కెమిస్ట్రీ ఆకట్టుకునేలా ఉంది. పల్లెటూరి వాతావరణాన్ని ప్రతిబింబించే సెట్లు, రంగురంగుల విజువల్స్, డ్యాన్స్ మూమెంట్స్ ఈ పాటకు ప్రత్యేక ఆకర్షణగా నిలిచాయి. మాస్ బీట్తో పాటు ఫోక్ టచ్ కలిసిన ఈ గీతం ప్రేక్షకులను అలరిస్తోంది.
సంగీత దర్శకుడు ఎస్. థమన్ అందించిన స్వరాలు పాటకు ప్రధాన బలంగా నిలిచాయి. సోషల్ మీడియాలో విడుదలైన కొద్ది సేపటికే ఈ సాంగ్కు మంచి స్పందన లభిస్తోంది. వరుణ్ తేజ్ను మరోసారి పూర్తి మాస్ అవతార్లో చూపించే ప్రయత్నం ఈ చిత్రంలో కనిపిస్తోందని అభిమానులు అభిప్రాయపడుతున్నారు.
వరుణ్ తేజ్ కెరీర్లో ‘ముకుంద’, ‘కంచె’, ‘ఫిదా’, ‘తొలిప్రేమ’ వంటి విజయవంతమైన చిత్రాల తర్వాత కొన్ని సినిమాలు ఆశించిన ఫలితాలు అందుకోలేదు. ‘గని’, ‘గాంఢీవధారి అర్జున’, ‘ఆపరేషన్ వాలెంటైన్’, ‘మట్కా’ వంటి చిత్రాలు బాక్సాఫీస్ వద్ద నిరాశపరిచాయి. ఈ నేపథ్యంలో దాదాపు రెండేళ్ల విరామం తర్వాత వస్తున్న ‘కొరియన్ కనకరాజు’పై అభిమానుల్లో భారీ అంచనాలు నెలకొన్నాయి.
కామెడీ, యాక్షన్, మాస్ ఎంటర్టైన్మెంట్ అంశాలతో తెరకెక్కిన ఈ సినిమా వరుణ్ తేజ్కు మళ్లీ విజయాన్ని అందిస్తుందా అనే ఆసక్తి సినీ వర్గాల్లో నెలకొంది.
