By టాలీవుడ్లో ఒకప్పుడు స్టార్ హీరోయిన్గా గుర్తింపు తెచ్చుకున్న రక్షిత తాజాగా తన లేటెస్ట్ లుక్తో సోషల్ మీడియాలో చర్చనీయాంశంగా మారింది. ఆమె ఇటీవల ఓ కార్యక్రమంలో కనిపించిన ఫొటోలు వైరల్ అవుతుండగా, బరువు పెరగడంతో చాలామంది అభిమానులు ఆమెను చూసినవారు తొలిచూపులో గుర్తుపట్టలేకపోయారు. దీంతో ఆమె ఆరోగ్యం గురించి సోషల్ మీడియాలో చర్చ సాగుతోంది. అయితే ఆమెకు ఎలాంటి అనారోగ్య సమస్య ఉందనే విషయంపై అధికారిక సమాచారం ఏమీ లేదు. బెంగళూరుకు చెందిన శ్వేత సినీ పరిశ్రమలోకి అడుగుపెట్టిన తర్వాత ‘రక్షిత’ అనే పేరుతో ప్రేక్షకులకు పరిచయమయ్యారు. ప్రముఖ కన్నడ సినిమాటోగ్రాఫర్ గౌరీశంకర్ కుమార్తె అయిన ఆమె, 2002లో పునీత్ రాజ్కుమార్ నటించిన ‘అప్పు’ సినిమాతో హీరోయిన్గా కెరీర్ ప్రారంభించారు. ఆ సినిమా విజయంతో తెలుగు, తమిళ భాషల్లో కూడా అవకాశాలు అందుకున్నారు.
తెలుగులో పూరి జగన్నాథ్ దర్శకత్వంలో వచ్చిన ‘ఇడియట్’ సినిమాతో రవితేజ సరసన నటించి మంచి గుర్తింపు సంపాదించారు. ఆ తర్వాత చిరంజీవి, నాగార్జున, మహేష్ బాబు, జూనియర్ ఎన్టీఆర్, జగపతి బాబు వంటి స్టార్ హీరోలతో పాటు కన్నడలో ఉపేంద్ర, సుదీప్, దర్శన్, శివరాజ్కుమార్ తదితర ప్రముఖ హీరోలతో నటించారు. ముఖ్యంగా కన్నడలో ‘కళాసిపాళ్య’ వంటి విజయవంతమైన సినిమాలతో అగ్రశ్రేణి హీరోయిన్గా ఎదిగారు.
2007లో దర్శకుడు ప్రేమ్ను వివాహం చేసుకున్న తర్వాత రక్షిత సినిమాలకు దూరమయ్యారు. అనంతరం నిర్మాతగా మారి ‘జోగయ్య’ సినిమాని నిర్మించారు. టెలివిజన్ రంగంలోనూ పలు రియాలిటీ షోలకు హోస్ట్గాను, జడ్జిగాను వ్యవహరించారు. అలాగే రాజకీయాల్లోకి ప్రవేశించి బీఎస్ఆర్ కాంగ్రెస్, జనతాదళ్ (సెక్యులర్), అనంతరం బీజేపీలో చేరారు.
ఇటీవల రక్షిత కొత్త ఫొటోలు వైరల్ కావడంతో ఆమె రూపంలో వచ్చిన మార్పుపై నెటిజన్లు చర్చిస్తున్నారు. బరువు పెరగడంతో ఆమె ఆరోగ్యంపై కొందరు సందేహాలు వ్యక్తం చేస్తున్నప్పటికీ, దీనిపై రక్షిత లేదా ఆమె కుటుంబ సభ్యుల నుంచి ఎలాంటి అధికారిక ప్రకటన వెలువడలేదు.
