By సీనియర్ నటుడు జగపతిబాబు ప్రధాన పాత్రలో తెరకెక్కుతున్న సైకలాజికల్ థ్రిల్లర్ ‘వదల’ ఈ నెల 17న ప్రేక్షకుల ముందుకు రానుంది. దర్శకుడు అకెళ్ల వి. కృష్ణ రూపొందించిన ఈ సినిమాలో లయ హీరోయిన్గా నటించగా, హృతిక శ్రీనివాస్ కీలక పాత్ర పోషించారు. తాజాగా విడుదలైన ట్రైలర్ సినిమాపై ఆసక్తిని పెంచుతోంది.
ట్రైలర్లో జగపతిబాబు, లయ సంతోషంగా జీవిస్తున్న దంపతులుగా కనిపిస్తారు. అయితే వారి జీవితంలోకి ఓ మిస్టరీ యువతి ప్రవేశించడంతో కథ ఊహించని మలుపు తిరుగుతుంది. జగపతిబాబు పాత్రపై ఆమెకు పెరిగిన వ్యామోహం, లయకు గుర్తుతెలియని వ్యక్తుల నుంచి వచ్చే బెదిరింపులు, కుటుంబంపై ఏర్పడే ముప్పు కథలో ఉత్కంఠను పెంచుతాయి.
కుటుంబాన్ని కాపాడుకునేందుకు పోరాడే వ్యక్తిగా జగపతిబాబు నటన ఆకట్టుకోగా, లయ భావోద్వేగభరిత పాత్రలో మెప్పించారు. హృతిక శ్రీనివాస్ పాత్ర ట్రైలర్కు ప్రధాన ఆకర్షణగా నిలిచింది. ఆమె హావభావాలు, నటన ప్రేక్షకుల్లో ఆసక్తిని రేకెత్తిస్తున్నాయి.
ఆ యువతి అసలు ఎవరు? జగపతిబాబు జీవితంలోకి ఎందుకు వచ్చింది? ఈ ఘటనల వెనుక దాగిన నిజం ఏమిటి? అనే ప్రశ్నలను ట్రైలర్ చివరి వరకు సస్పెన్స్గా ఉంచారు. చోటా కె. నాయుడు సినిమాటోగ్రఫీ, కార్తీక్ కోడకండ్ల బ్యాక్గ్రౌండ్ స్కోర్ థ్రిల్లర్ మూడ్ను మరింత బలపరిచాయి. కుటుంబ భావోద్వేగాలు, సైకలాజికల్ థ్రిల్ కలగలిపిన ఈ సినిమా ప్రేక్షకులను ఏ మేరకు ఆకట్టుకుంటుందో చూడాలి.
