By వివాదాస్పద దర్శకుడు రామ్ గోపాల్ వర్మ తన సినీ ప్రయాణంపై ఆసక్తికర వ్యాఖ్యలు చేశారు. ఓ ఇంటర్వ్యూలో మాట్లాడుతూ, తన కెరీర్లో అత్యంత నిరాశపరిచిన చిత్రంగా ‘అంతం’ను పేర్కొన్నారు. ప్రముఖ రచయిత జేమ్స్ హాడ్లీ ఛేజ్ నవల ఆధారంగా తెరకెక్కించిన ఈ చిత్రాన్ని తాను అనుకున్న స్థాయిలో రూపొందించలేకపోయానని చెప్పారు. అయితే, అదే సినిమా తన జీవితంలో కీలక మలుపు తీసుకొచ్చిందని వెల్లడించారు.
‘అంతం’ సినిమాతో నటి ఊర్మిళ మటోండ్కర్ పరిచయం కావడం, ఆ తర్వాత ఆమెతో రూపొందించిన ‘రంగీలా’ తన బాలీవుడ్ కెరీర్ను మరో స్థాయికి తీసుకెళ్లిందని తెలిపారు. అలాగే, ‘అంతం’ ఆశించిన ఫలితం ఇవ్వకపోవడంతో అదే భావాన్ని కొత్త కోణంలో చూపిస్తూ ‘సత్య’ చిత్రాన్ని తెరకెక్కించినట్లు చెప్పారు. ప్రేక్షకుల దృష్టిలో ‘అంతం’ ఫ్లాప్ అయినా, తన జీవితంలో మాత్రం ఎంతో విలువైన చిత్రమని అన్నారు.
తాజా ప్రాజెక్టులపై స్పందిస్తూ, వైఎస్ జగన్ మోహన్ రెడ్డి జీవితంపై తెరకెక్కిస్తున్న సినిమా పనులు కొనసాగుతున్నాయని, ఇప్పటికే సుమారు 30 శాతం చిత్రీకరణ పూర్తయిందని చెప్పారు. కోపం తనకు ఉండదని, అర్థంలేని ప్రశ్నలు లేదా పనికి ఆటంకం కలిగితే మాత్రమే తాత్కాలిక చిరాకు వస్తుందని పేర్కొన్నారు. గతం, భవిష్యత్తు గురించి కాకుండా ప్రస్తుతం ఉన్న క్షణాన్ని ఆస్వాదించడానికే తాను ఎక్కువ ప్రాధాన్యం ఇస్తానని వర్మ వివరించారు.
