హీరో నుంచి నిర్మాతగా ప్రదీప్

తమిళ యువ నటుడు, దర్శకుడు ప్రదీప్ రంగనాథన్ వరుస విజయాలతో ప్రత్యేక గుర్తింపు సంపాదించారు. ‘లవ్ టుడే’, ‘డ్రాగన్’ వంటి చిత్రాలతో భారీ విజయాలు అందుకున్న ఆయన, ఇటీవల విడుదలైన ‘LIK: Love Insurance Kompany’ ఆశించిన ఫలితాన్ని ఇవ్వలేదు. అయినప్పటికీ వెనక్కి తగ్గకుండా ఇప్పుడు నిర్మాతగా కొత్త ప్రయాణాన్ని ప్రారంభించారు.

ఇప్పటికే నటుడు, దర్శకుడు, కథా రచయిత, గేయ రచయితగా తన ప్రతిభను చాటుకున్న ప్రదీప్.. తాజాగా ‘PR Show’ పేరుతో సొంత నిర్మాణ సంస్థను ప్రారంభించారు. ఈ బ్యానర్‌పై తొలి చిత్రాన్ని నిర్మిస్తున్నట్లు అధికారికంగా ప్రకటించారు.

ఈ సినిమాలో మమిత బైజు హీరోయిన్‌గా నటిస్తుండగా, దర్శకుడు-నటుడు అశ్వత్ మారిముత్తు కీలక పాత్రలో కనిపించనున్నారు. అలాగే అనామిక మహి ఈ చిత్రంతో వెండితెరకు పరిచయం అవుతోంది. తెలుగు నటుడు శివాజీ సొంటినేని, నటి స్వాసిక ఇతర ప్రధాన పాత్రలు పోషిస్తున్నారు.

ఈ ప్రాజెక్ట్‌కు ప్రత్యేక ఆకర్షణగా ‘ది ఆల్ఫా యూనిట్’ నిలవనుంది. విశాల్ టీఆర్, యశ్ వి, నరేన్ సౌదా, చాణక్యన్ ఆర్, ధనుష్ కుమార్, ఇళంపరితి అనే ఆరుగురు యువ దర్శకులు సంయుక్తంగా ఈ చిత్రానికి దర్శకత్వం వహిస్తున్నారు. ఈ వినూత్న ప్రయత్నం సినీ వర్గాల్లో ఆసక్తిని రేకెత్తిస్తోంది.

ఈ సినిమాకి కథను స్వయంగా ప్రదీప్ రంగనాథన్ అందించగా, సంగీతాన్ని సాయి అభ్యంకర్ సమకూరుస్తున్నారు. సినిమాటోగ్రఫీని దినేష్ పురుషోత్తమన్, ఎడిటింగ్‌ను ప్రదీప్ ఈ. రాఘవ్ నిర్వహిస్తున్నారు. ఇప్పటికే విడుదలైన అనౌన్స్‌మెంట్ వీడియో సినిమాపై మంచి ఆసక్తిని పెంచింది. ప్రస్తుతం ప్రీ-ప్రొడక్షన్ దశలో ఉన్న ఈ సినిమా షూటింగ్, విడుదలకు సంబంధించిన పూర్తి వివరాలను త్వరలోనే చిత్రబృందం వెల్లడించనుంది.