By ప్రగ్యా జైస్వాల్‌ ‘డాకు మహారాజ్’ ఈ సినిమాలో నా పేరు కావేరి. అభినయానికి ఆస్కారమున్న డీ గ్లామరస్‌ రోల్‌. ఇప్పటివరకూ నేను చేసిన పాత్రలకు పూర్తి భిన్నమైన పాత్ర. ఛాలెంజ్‌గా తీసుకుని చేశాను. దర్శకుడు బాబీ ఈ పాత్రను అద్భుతంగా డిజైన్‌ చేశారు. అని కథానాయిక ప్రగ్యా జైస్వాల్‌ తెలిపారు. బాలకృష్ణ కథానాయకుడిగా బాబీ కొల్లి దర్శకత్వంలో సూర్యదేవర నాగవంశీ, సాయిసౌజన్య నిర్మించిన సినిమా ‘డాకు మహారాజ్’. సంక్రాంతి కానుకగా ఈ నెల 12న సినిమా విడుదల కానుంది. ఈ సందర్భంగా గురువారం హైదరాబాద్‌లో ప్రగ్యా విలేకరులతో ముచ్చటించింది. ‘బాలకృష్ణతో వరుసగా సినిమా చేసే అవకాశం రావడం గౌరవంగా భావిస్తున్నా. ‘అఖండ’తో నా కెరీర్‌ మలుపు తిరిగింది. ఇప్పుడు ‘డాకు మహారాజ్’ లాంటి గొప్ప సినిమాలో మళ్లీ ఆయనతో సెకండ్ టైమ్ కలిసి నటించే భాగ్యం దొరికింది’ అంటూ ఆనందం వెలిబుచ్చింది ప్రగ్యా జైస్వాల్‌. దర్శకుడు బాబీ ఈ కథ చెప్పినప్పుడే పెద్ద హిట్‌ అవుతుందని నమ్మానని, నిర్మాత నాగవంశీ పాషన్‌తో సినిమా తీస్తారని, అలాగే గొప్పగా నిర్మించారని ప్రగ్య పేర్కొన్నారు. జనవరి 12 తన పుట్టినరోజు అని, అదేరోజు ‘డాకు మహారాజ్’ విడుదల అవుతుండటం ఒక కో ఇన్సిడెంట్‌గా నేను భావిస్తున్నాను, ఇంకా నాకు సంతోషంగా కూడా ఉందని ప్రగ్యా జైస్వాల్‌ అన్నారు.
