By అక్కినేని హీరో సుమంత్ ప్రస్తుతం ‘మహేంద్రగిరి వారాహి’ సినిమా ప్రమోషన్లలో బిజీగా ఉన్నారు. ఈ సందర్భంగా ఇచ్చిన ఓ ఇంటర్వ్యూలో మాజీ భార్య కీర్తి రెడ్డితో తన బంధం, రెండో పెళ్లిపై ఆసక్తికర వ్యాఖ్యలు చేశారు. విడాకులు తీసుకున్నప్పటికీ తమ మధ్య ఎలాంటి ద్వేషం లేదని సుమంత్ స్పష్టం చేశారు. ఇప్పటికీ తామిద్దరం మంచి స్నేహితులుగానే కొనసాగుతున్నామని, కీర్తి రెడ్డి కుటుంబ సభ్యులతో కూడా తనకు సత్సంబంధాలు ఉన్నాయని వెల్లడించారు. గతాన్ని పట్టుకుని ఉండకుండా ఒకరినొకరు అర్థం చేసుకుని ముందుకు సాగాలని నిర్ణయించుకున్నామని చెప్పారు.
తమ పెళ్లి సమయంలో ఇద్దరికీ జీవితంపై సరైన పరిణతి లేకపోవడమే విడాకులకు ప్రధాన కారణమని సుమంత్ తెలిపారు. ఎలాంటి గొడవలు లేదా ఇతర సమస్యల వల్ల కాదు, పరిస్థితులు, అప్పటి ఆలోచనా విధానం కారణంగానే విడిపోవాల్సి వచ్చిందని వివరించారు.
రెండో పెళ్లిపై స్పందిస్తూ ప్రస్తుతం ఒంటరి జీవితంతో సంతోషంగా ఉన్నానని, మళ్లీ పెళ్లి చేసుకోవాలనే ఆలోచన లేదని స్పష్టం చేశారు. సుమంత్ చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి.
