By దేశంలో జరుగుతున్న సామాజిక, ప్రజా సమస్యలపై ప్రతి పౌరుడు బాధ్యతగా స్పందించాలని నటి, నిర్మాత మంచు లక్ష్మి పిలుపునిచ్చారు. “మనకెందుకులే” అనే నిర్లక్ష్య ధోరణిని విడిచిపెట్టి, సమాజంలో జరుగుతున్న అన్యాయాలపై ప్రతి ఒక్కరూ తమ స్వరం వినిపించాలని ఆమె కోరారు.
పర్యావరణవేత్త, సామాజిక కార్యకర్త సోనమ్ వాంగ్చుక్కు మద్దతుగా విడుదల చేసిన వీడియోలో మంచు లక్ష్మి తన అభిప్రాయాలను వెల్లడించారు. దేశంలో కీలక సమస్యలు ఎదురవుతున్నా చాలామంది మౌనం పాటించడం ప్రజాస్వామ్యానికి మంచిది కాదని ఆమె అన్నారు.
ప్రతి ఒక్కరూ ఉద్యమాల్లో పాల్గొనాల్సిన అవసరం లేకపోయినా, సమస్యలపై మాట్లాడటం, చర్చించడం, సోషల్ మీడియా ద్వారా స్పందించడం కూడా బాధ్యతాయుతమైన పౌరుడి కర్తవ్యమేనని పేర్కొన్నారు. ప్రజల హక్కుల కోసం పోరాడుతున్న సోనమ్ వాంగ్చుక్ వంటి వ్యక్తులకు సమాజం అండగా నిలవాలని ఆమె కోరారు.
రాజకీయ విమర్శల కంటే దేశ భవిష్యత్తు, రాబోయే తరాల సంక్షేమం కోసం బాధ్యతతో స్పందించడం ముఖ్యమని మంచు లక్ష్మి అన్నారు. దేశంలో జరుగుతున్న పరిణామాలపై ప్రజలు మౌనంగా ఉండకుండా చొరవ చూపాలని ఆమె చేసిన విజ్ఞప్తి ప్రస్తుతం సోషల్ మీడియాలో వైరల్గా మారింది. ఆమె సందేశానికి పలువురు నెటిజన్లు మద్దతు తెలుపుతున్నారు.
