By టాలీవుడ్ కింగ్ నాగార్జున కెరీర్లో అత్యంత ప్రతిష్ఠాత్మకంగా రూపొందుతున్న 100వ సినిమాపై అభిమానుల్లో భారీ ఆసక్తి నెలకొంది. ప్రస్తుతం దర్శకుడు రా కార్తీక్ తెరకెక్కిస్తున్న ఈ సినిమా షూటింగ్ చివరి దశకు చేరుకున్నట్లు తెలుస్తోంది. అన్నపూర్ణ స్టూడియోస్ నిర్మిస్తున్న ఈ సినిమాలో సీనియర్ నటి టబు కీలక పాత్రలో నటిస్తున్నారు. చిత్రీకరణ వేగంగా కొనసాగుతున్నప్పటికీ, ఇప్పటివరకు సినిమా టైటిల్, ఫస్ట్ లుక్ లేదా ఇతర అధికారిక అప్డేట్లను చిత్రబృందం ప్రకటించలేదు. దీంతో అభిమానులు ఆసక్తిగా ఎదురుచూస్తున్నారు. తాజా సమాచారం ప్రకారం, నాగార్జున పుట్టినరోజు సందర్భంగా ఆగస్టులో ఈ సినిమాకి సంబంధించిన టైటిల్ టీజర్ లేదా తొలి ప్రచార వీడియోను విడుదల చేసేలా మేకర్స్ ప్రణాళికలు సిద్ధం చేస్తున్నట్లు సినీ వర్గాల్లో ప్రచారం జరుగుతోంది.
మొదట ఈ సినిమాను దసరా కానుకగా విడుదల చేసే అవకాశం ఉందని వార్తలు వినిపించాయి. అయితే ప్రస్తుతం పోస్ట్ ప్రొడక్షన్ పనులు, విడుదల ప్రణాళికలను దృష్టిలో ఉంచుకుని డిసెంబర్ లేదా వచ్చే ఏడాది సంక్రాంతి బరిలోకి తీసుకురావాలని చిత్రబృందం ఆలోచిస్తున్నట్లు సమాచారం. విడుదల తేదీపై స్పష్టత కూడా ఆగస్టులో వచ్చే ప్రచార సామగ్రితో వెల్లడయ్యే అవకాశముందని టాక్ వినిపిస్తోంది.
ప్రస్తుతం ‘కింగ్ 100’ అనే వర్కింగ్ టైటిల్తో రూపొందుతున్న ఈ సినిమాలో నాగార్జున విభిన్న గెటప్పుల్లో కనిపించనున్నారని సమాచారం. కథ, పాత్ర రూపకల్పనలో కొత్తదనం ఉండేలా దర్శకుడు ప్రత్యేక శ్రద్ధ తీసుకుంటున్నట్లు సినీ వర్గాలు చెబుతున్నాయి. అయితే ఈ వివరాలన్నింటిపై చిత్రబృందం నుంచి అధికారిక ప్రకటన రావాల్సి ఉంది. అప్పటివరకు అభిమానులు మేకర్స్ అప్డేట్ కోసం ఆసక్తిగా ఎదురుచూస్తున్నారు.
