By మాలీవుడ్లో విభిన్న కథాంశాలతో రూపొందిన ‘మాలీవుడ్ టైమ్స్’ (Mollywood Times) ప్రస్తుతం ఓటీటీలో ప్రేక్షకుల దృష్టిని ఆకర్షిస్తోంది. ఇది తెలుగులో డబ్ అయి ప్రస్తుతం అందుబాటులో ఉన్న సినిమా. సైకలాజికల్ థ్రిల్లర్, హర్రర్, డార్క్ కామెడీ అంశాల కలయికతో రూపొందిన ఈ సినిమా ఉత్కంఠభరితమైన కథనంతో చివరి వరకు ఆసక్తిని కొనసాగిస్తుంది. ప్రస్తుతం ఈ సినిమా జియోహాట్స్టార్లో స్ట్రీమింగ్ అవుతోంది. అభినవ్ సుందర్ నాయక్ దర్శకత్వం వహించిన ఈ సినిమాకి రాము సునీల్ కథ అందించారు. సాధారణ హర్రర్ కథకు భిన్నంగా, సినిమా ప్రపంచం నేపథ్యంలో సాగే ఈ కథ ప్రేక్షకులను కొత్త అనుభూతికి గురిచేస్తోంది.
కథ ఒక యువ దర్శకుడి చుట్టూ తిరుగుతుంది. మలయాళ సినీ పరిశ్రమలో ప్రముఖ హర్రర్ దర్శకుడిగా పేరు తెచ్చుకోవాలన్నదే అతని కల. అయితే సినిమా ప్రపంచంలో దాగి ఉన్న కొన్ని భయానక నిజాల గురించి అతని తండ్రి పదేపదే హెచ్చరిస్తుంటాడు. అయినప్పటికీ తన లక్ష్యాన్ని వదలని ఆ యువకుడు కొత్త కథ కోసం చేసిన ప్రయాణంలో ఊహించని సంఘటనలు ఎదుర్కొంటాడు. ఒక్కో రహస్యం బయటపడే కొద్దీ కథ అనూహ్య మలుపులు తిరుగుతుంది.
హర్రర్తో పాటు డార్క్ హ్యూమర్ను దర్శకుడు చక్కగా మేళవించాడు. ప్రతి పాత్ర వెనుక ఒక రహస్యం ఉండటం, చిన్న చిన్న క్లూలను చివర్లో పెద్ద ట్విస్ట్తో అనుసంధానం చేయడం సినిమా ప్రత్యేకతగా నిలుస్తుంది. ముఖ్యంగా క్లైమాక్స్లో వచ్చే ట్విస్ట్ ప్రేక్షకులను ఆశ్చర్యానికి గురిచేస్తుంది.
బ్యాక్గ్రౌండ్ స్కోర్, సినిమాటోగ్రఫీ, డార్క్ విజువల్స్ సినిమాకు మరింత బలం చేకూర్చాయి. హర్రర్ కంటే ఎక్కువగా మానసిక సంఘర్షణలు, విజయంపై మోజు, సినిమా ప్రపంచంలోని మరో కోణాన్ని ఈ సినిమా చూపించే ప్రయత్నం చేసింది. సస్పెన్స్, హర్రర్, డార్క్ కామెడీ జానర్లను ఇష్టపడే ప్రేక్షకులకు ‘మాలీవుడ్ టైమ్స్’ మంచి ఎంపికగా నిలుస్తోంది. చివరి ట్విస్ట్ కోసం అయినా ఒకసారి చూడదగ్గ సినిమాగా సినీ అభిమానులు అభిప్రాయపడుతున్నారు..!
