By రామ్‌చరణ్‌ నటిస్తున్న రూరల్‌ స్పోర్ట్స్‌ డ్రామా ‘పెద్ది’ నిర్మాణం నుండే దేశవ్యాప్తంగా భారీ హైప్‌ క్రియేట్‌ చేస్తోంది. ముఖ్యంగా ఫస్ట్‌గ్లింప్స్‌ ఒక్కసారి సినిమాపై అంచనాల్ని పెంచింది. బుచ్చిబాబు సానా దర్శకత్వంలో వృద్ధి సినిమాస్‌, మైత్రీ మూవీ మేకర్స్‌, సుకుమార్‌ రైటింగ్స్‌ ఈ సినిమాని నిర్మిస్తున్నాయి. ప్రస్తుతం చిత్రీకరణ జరుగుతోంది. హైదరాబాద్‌లో వేసిన భారీ సెట్‌లో యాక్షన్‌ ఘట్టాలను తెరకెక్కిస్తున్నారు. ఇందులో ట్రైన్ సెట్‌ను తీర్చిదిద్దారు కళా దర్శకుడు అవినాష్‌ కొల్లా. రామ్‌చరణ్‌ రిస్కీ స్టంట్స్‌ చేస్తున్నారని, ‘పుష్ప-2’తో పేరుపొందిన యాక్షన్‌ కొరియోగ్రాఫర్‌ నబాకాంత్‌ ఈ ఫైట్‌ సీక్వెన్స్‌కు రూపకల్పన చేశారని చిత్రబృందం పేర్కొంది. భారతీయ సినీ చరిత్రలో యాక్షన్‌ పరంగా కొత్త ప్రమాణాలను నిర్ధేశిస్తూ ఈ యాక్షన్‌ ఎపిసోడ్‌ను తెరకెక్కిస్తున్నామని నిర్మాతలు తెలిపారు. క్రికెట్‌, మల్లయుద్ధంతో పాటు మరికొన్ని గ్రామీణ క్రీడల నేపథ్యంలో యాక్షన్‌ డ్రామాగా ఈ సినిమాని రూపొందిస్తున్నారు. వచ్చే ఏడాది మార్చి 27న విడుదల కానుంది. జాన్వీకపూర్‌, శివరాజ్‌కుమార్‌, జగపతిబాబు తదితరులు నటిస్తున్న ఈ చిత్రానికి సంగీతం: ఎఆర్‌ రెహమాన్‌.
