By గ‌త కొద్ది రోజులుగా మంచు ఫ్యామిలీ కన్నప్ప సినిమా ప్ర‌మోష‌న్స్‌తో పాటు పలు వివాదాలతో వార్త‌ల‌లో నిలుస్తుండ‌డం మ‌నం చూస్తూనే ఉన్నాం. ప్ర‌స్తుతం మంచు మ‌నోజ్‌ – విష్ణు గొడ‌వ కాస్త స‌ద్దుమ‌ణిగిన‌ట్టే క‌నిపిస్తోంది. అయితే మోహన్బాబు, విష్ణు గ‌త కొద్ది రోజులుగా కన్నప్ప సినిమాపై పూర్తిగా దృష్టి పెట్టారు. సినిమాని జ‌నాల‌లోకి తీసుకెళ్లేందుకు గ‌ట్టిగానే ప్ర‌చారాలు చేస్తున్నారు. పలు నగరాల్లో కన్నప్ప కోసం ఈవెంట్లు నిర్వ‌హించారు. చివరగా హైదరాబాద్‌లో కన్నప్ప ప్రీరిలీజ్ ఈవెంట్‌కు భారీ ఎత్తున సన్నాహాలు చేశారు. మరికొద్ది రోజుల్లో సినిమా ప్రేక్షకుల ముందుకు రానుండడంతో సినిమాకి సంబంధించిన విశేషాలు నెట్టింట వైర‌ల్ అవుతున్నాయి. ఇటీవ‌ల కన్నప్ప ప్ర‌మోష‌న్స్‌లో భాగంగా న్యూజిలాండ్‌లో టీం చిల్ అయిన ఓ వీడియోని బ్రహ్మాజీ షేర్ చేశారు. ఈ వీడియాలో మోహన్బాబు.. ఓ సువిశాల మైదానంలో నిల్చుని ఇదంతా నాది, విష్ణుదే.. అంటాడు. ఈ వీడియో తీస్తున్న బ్రహ్మాజీ.. ఇన్‌కమ్‌ ట్యాక్స్‌ వాళ్లు వింటున్నారుగా.. మొత్తం బ్లాక్‌మనీ తీసుకొచ్చి ఇక్కడ పెట్టారని సరదాగా అంటాడు. దాంతో మోహన్బాబు.. మా దగ్గర బ్లాక్‌మనీయే లేదు. న్యూజిలాండ్‌లోని వనాకాలో ఓ ఇల్లు, 7000 ఎకరాలు కొన్నాం. ఇదంతా మనదే అని జోక్ చేయ‌గా, అంత‌లో ప్రభుదేవా అక్కడికి రావడంతో ప్రభుదేవాతో కలిసి ఏడు వేల ఎకరాలు కొన్నట్లు మాట మారుస్తాడు. ఈ ఫన్నీ వీడియో ఇప్పుడు నెట్టింట వైరల్‌గా మార‌డంతో దీనిపై జోరుగా చ‌ర్చ‌లు న‌డుస్తున్నాయి. ప్ర‌మోష‌న్ కోసం సరదాగా చేసిన వీడియోని కూడా ఇంత సీరియస్‌గా తీసుకుని వార్తలు రాస్తుండ‌డంతో బ్రహ్మాజీ స్పందించారు. నేను షేర్ చేసిన ఆ వీడియోలో మేం అంతా ఏదో సరదాగా మాట్లాడుకుంటూ ఏడు వేల ఎకరాలు అని అన్నాం. కొండలు కూడా కొనేశామని ఫన్నీగా చెప్పుకొచ్చాం. మేం అంతా అలా ఏదో సరదాగా ముచ్చట్లు పెట్టుకుని జోకులు వేసుకున్నాం.. అంతే గానీ కొనుగోళ్లు ఏమీ జరగలేదు.
