షారుఖ్ ఖాన్‌ బ‌ర్త్‌డే నవంబర్‌లో..

బాలీవుడ్ బాద్‌షా షారుఖ్ ఖాన్ మ‌రో వారం రోజుల్లో త‌న 60వ పుట్టినరోజు (నవంబర్ 2) జ‌రుపుకోబోతున్నారు. ఈ సంద‌ర్భంగా ఆయ‌న అభిమానుల‌కు ప్రత్యేక బహుమతిని అందించేందుకు సిద్ధమయ్యారు షారుఖ్. ‘షారుఖ్ ఖాన్ ఫిల్మ్ ఫెస్టివల్’ పేరుతో ఆయన నటించిన సూపర్‌హిట్ చిత్రాలను అక్టోబర్ 31 నుండి థియేటర్లలో మళ్లీ ప్రదర్శించబోతున్నారు. ఈ ఫెస్టివల్‌లో ‘దిల్ సే’, ‘దేవదాస్’, ‘మై హూ నా’, ‘ఓం శాంతి ఓం’, ‘చెన్నై ఎక్స్‌ప్రెస్’ వంటి షారుఖ్ కెరీర్‌లోని ఐకానిక్ సినిమాలు రీ-రిలీజ్ కానున్నాయి. షారుఖ్ ఈ సందర్భంగా మాట్లాడుతూ ఈ సినిమాల్లోని నా పాత్రలు ఇప్పటికీ అభిమానుల గుండెల్లో నిలిచిపోయాయి. నేను మారలేదు, కేవలం జుట్టు మాత్రమే కొంచెం స్టైలిష్‌గా మారింది. ఈ ఫెస్టివల్ ద్వారా అభిమానులతో మళ్లీ ఆ బంధాన్ని షేర్ చేయడం ఆనందంగా ఉంది అని తెలిపాడు. ఈ ఫిల్మ్ ఫెస్టివల్ అక్టోబర్ 31 నుంచి నవంబర్ 14 వరకు భారతదేశంలోని పీవీఆర్ ఐనాక్స్ థియేటర్లలో అలాగే ఉత్తర అమెరికా, యూకే, ఆస్ట్రేలియా, న్యూజిలాండ్, యూరప్ దేశాల్లో యశ్‌రాజ్ ఫిల్మ్స్ (వైఆర్‌ఎఫ్) సహకారంతో ప్రదర్శితం కానుంది.