By బాలీవుడ్ హీరో హృతిక్ రోషన్‌కు ఢిల్లీ హైకోర్టులో భారీ ఊరట లభించింది.
తన అనుమతి లేకుండా వాణిజ్య ప్రయోజనాల కోసం తన పేరు, ఫొటోలు, వాయిస్‌ను వాడుకోకుండా నిషేధించాల‌ని హృతిక్ కోర్టును ఆశ్ర‌యించ‌గా.. ఈ కేసుపై న్యాయస్థానం కీలక ఆదేశాలు జారీ చేసింది.
తన వ్యక్తిత్వ హక్కులను కాపాడాలని కోరుతూ హృతిక్ రోషన్ ఇటీవల ఢిల్లీ హైకోర్టులో పిటిష‌న్ దాఖలు చేశాడు. ఈ పిటిష‌న్‌లో తన పేరును దుర్వినియోగం చేస్తూ కొందరు వ్యక్తులు, ఈ-కామర్స్ సంస్థలు వాణిజ్య ఉత్పత్తులను అమ్ముతున్నారని ఏఐ ద్వారా మార్ఫింగ్ చేసిన అభ్యంతరకరమైన కంటెంట్‌ను ప్రచారం చేస్తున్నారని ఆయన ఆరోపించారు.
అయితే హృతిక్ పిటిష‌న్ నేడు విచార‌ణ‌కు రాగా.. ఈ కేసును విచారించిన న్యాయస్థానం హృతిక్ రోషన్‌కు అనుకూలంగా తీర్పునిచ్చింది. ఇకపై హృతిక్ అనుమతి లేకుండా ఆయన పేరు కానీ, ఫొటోలు, వాయిస్ లేదా ఇతర వ్యక్తిగత లక్షణాలను వాణిజ్య ప్రయోజనాలకు వాడుకోవడానికి వీల్లేదని ఆదేశించింది. అలాగే ఈ-కామర్స్ వెబ్‌సైట్‌లలో హృతిక్ రోషన్‌కి సంబంధించిన ఫొటోలు, ఆయనకు సంబంధించిన అభ్యంతరకరమైన ఏఐ జనరేటెడ్ కంటెంట్ లింక్‌లను తక్షణమే తొలగించాలని న్యాయస్థానం సంబంధిత సంస్థలకు ఆదేశాలు జారీచేసింది.
