By ‘ఓ విభిన్నమైన సినిమా ‘త్రిబాణధారి బార్బరిక్‌’. ఈ సినిమాకు కథే హీరో. ఇక పాత్రధారులంతా ఎవరికి వాళ్లే మెయిన్‌గా ఫీలవ్వొచ్చు. అలాంటి భిన్నమైన కాన్సెప్ట్‌ ఇది. డబ్బింగ్‌ చెప్పేటప్పుడు ఇతర సీన్లను కూడా అడిగి చూశాను. దర్శకుడు, డీఓపీ కలిసి కెమెరా యాంగిల్స్‌తోనే సస్పెన్స్‌ క్రియేట్‌ చేశారు. ‘బార్బరిక్‌’ లాంటి మంచి పాత్రలు మరిన్ని చేయాలని ఆశిస్తున్నా. నా మిత్రుడు చిరంజీవి పుట్టినరోజైన ఆగస్ట్‌ 22న ఈ సినిమా విడుదల చేస్తామనడంతో చాలా ఆనందం అనిపించింది.’ అని నటుడు సత్యరాజ్‌ అన్నారు. ఆయన ప్రధాన పాత్రలో రూపొందిన సినిమా ‘త్రిబాణధారి బార్బరిక్‌’. వశిష్ట ఎన్‌.సింహా, సత్యం రాజేష్‌, ఉదయభాను, క్రాంతి కిరణ్‌, సాంచీ రాయ్ ముఖ్య పాత్రధారులు. మోహన్‌ శ్రీవత్స దర్శకుడు. దర్శకుడు మారుతి సమర్పణలో వానర సెల్యూలాయిడ్‌ పతాకంపై విజయ్‌పాల్‌రెడ్డి అడిసెల నిర్మిస్తున్న ఈ సినిమా ఈ నెల 22న చిరంజీవి పుట్టినరోజు కానుకగా విడుదల కానుంది.
