By రామ్‌చరణ్ హీరోగా తెరకెక్కుతున్న ‘పెద్ది’ సినిమా షూటింగ్ శరవేగంగా జరుగుతోంది. ప్రస్తుతం హైదరాబాద్‌లోని ఓ భారీ సెట్‌లో కీలక సన్నివేశాలను చిత్రీకరిస్తున్నారు మేకర్స్. ఈ షెడ్యూల్‌లో భాగంగా భారీ పోరాట సన్నివేశాలతో పాటు, చిత్రంలోని ముఖ్య తారాగణంపై కీలక సన్నివేశాలను తెరకెక్కిస్తున్నట్లు చిత్ర యూనిట్ తెలిపింది. ఇదిలావుంటే, తాజాగా ఈ సినిమా సెట్స్ నుండి ఒక ఫొటో బయటకు వచ్చింది. ‘పెద్ది’ చిత్ర యూనిట్‌లోని ఒక సభ్యుడి పుట్టినరోజు సందర్భంగా టీమ్‌ సభ్యులు అతడి బర్త్‌డేని గ్రాండ్‌గా సెలబ్రేట్ చేశారు. రామ్ చరణ్‌తో పాటు జాన్వీ కపూర్ దగ్గరుండి అతడితో కేక్ కట్ చేయించారు. ఈ వేడుకకు సంబంధించిన ఫొటోలు ప్రస్తుతం సోషల్ మీడియాలో వైరల్‌గా మారాయి. బుచ్చిబాబు సానా దర్శకత్వం వహిస్తున్న ఈ ప్రతిష్టాత్మక సినిమాలో రామ్‌చరణ్‌తో పాటు కన్నడ స్టార్ శివ రాజ్‌కుమార్, బాలీవుడ్ నటి జాన్వీ కపూర్ ప్రధాన పాత్రల్లో నటిస్తున్నారు. ఎ.ఆర్. రెహమాన్ సంగీతం అందిస్తున్నారు. జగపతిబాబు, దివ్యేందు భట్టాచార్య వంటి ప్రముఖ నటులు కీలక పాత్రల్లో కనిపించనున్నారు.
