బాలీవుడ్‌కి ఊపిరిపోస్తున్న అజ‌య్ దేవ‌గ‌ణ్..

ఇటీవ‌లి కాలంలో బాలీవుడ్ సినిమాలు పెద్ద‌గా స‌క్సెస్ సాధించింది లేదు. ఖాన్ హీరోల సినిమాల‌కి కూడా ఆద‌ర‌ణ ద‌క్క‌డం లేదు. దాంతో బాలీవుడ్ ప‌ని ఖ‌త‌మైన‌ట్టే అని అంద‌రూ అనుకుంటున్నారు. కానీ ఇప్పుడు సీనియ‌ర్ హీరో అజ‌య్ దేవ‌గ‌ణ్.. బాలీవుడ్‌కి ఊపిరి పోశాడు. ఆయ‌న న‌టించిన రైడ్ 2 సినిమా మంచి హిట్ టాక్ ద‌క్కించుకోగా, తొలి రోజు బాక్సాఫీస్ ద‌గ్గ‌ర భారీ వ‌సూళ్లే రాబ‌ట్టింది. అజయ్ దేవగణ్, రితేష్ దేశ్‌ముఖ్ నటించిన `రైడ్ 2` సినిమా మొదటి రోజు 18.25 కోట్ల వసూళ్లు సాధించింది. `రైడ్ 2` సినిమా 2018లో వచ్చిన `రైడ్` కి సీక్వెల్‌గా రూపొందింది. రైడ్ 2 సినిమా ఐటీ రైడ్స్ ప్రధానంగా తెర‌కెక్క‌గా, ఇందులో సౌరభ్ శుక్లా విలన్ పాత్ర పోషించారు. అదే సమయంలో, `రైడ్ 2`లో రితేష్ దేశ్‌ముఖ్ విలన్ పాత్రలో నటించారు. దర్శకుడు రాజ్‌కుమార్ గుప్తా `రైడ్ 2 ` సినిమాని 48 కోట్ల బడ్జెట్‌తో తెరకెక్కించ‌గా, ఈ సినిమాకి భూషణ్ కుమార్, అభిషేక్ పాఠక్, కృష్ణ కుమార్ నిర్మాత‌లుగా వ్య‌వ‌హ‌రించారు. వాణీకపూర్, రజత్ కపూర్, సౌరభ్ శుక్లా, సుప్రియా పాఠక్, అమిత్ సైల్, యశ్‌పాల్ శర్మ, గోవింద్ నామ్‌దేవ్, బ్రిజేంద్ర కాలా ప్రధాన పాత్రల్లో నటించారు. తొలిరోజు ఈ సినిమా మంచి వ‌సూళ్లే రాబ‌ట్ట‌గా, వారాంతంలో మ‌రిన్ని వ‌సూళ్లు రాబ‌డుతుంద‌ని అంటున్నారు. రైడ్ 2 జోరు చూస్తుంటే మొదటి వారాంతంలోనే బ్రేక్‌ ఈవెన్‌ అవుతుందనే ట్రేడ్‌ వర్గాలు అంచనా వేస్తున్నాయి.