By మాస్ మహారాజా రవితేజ ఎలాంటి పరిస్థితులు ఎదురైనా, తన ప్రొఫెషనల్ క‌మిట్‌మెంట్‌ను ఎట్టి పరిస్థితుల్లోనూ వ‌ద‌ల‌డు. తాజాగా ఆయన చేసిన పనికి ప్ర‌శంస‌ల వ‌ర్షం కురిపిస్తున్నారు ఫ్యాన్స్. కొద్ది రోజుల క్రితమే రవితేజ తండ్రి రాజగోపాల్ రాజు వృద్ధాప్య సంబంధిత అనారోగ్యంతో మరణించారు. కుటుంబంలో విషాదం చోటు చేసుకున్నా, రెండు రోజుల విరామం తీసుకుని మూడో రోజే ‘RT76’ సినిమా షూటింగ్‌కు హాజర‌య్యారు రవితేజ. ఈ ఘటన చిత్రబృందాన్ని, అభిమానులను ఒకింత ఆశ్చర్యానికి గురి చేసింది. నిర్మాతను దృష్టిలో పెట్టుకుని రవితేజ ఈ కీలక నిర్ణ‌యాన్ని తీసుకున్నారు. ప్ర‌స్తుతం ఈ సినిమాకు సంబంధించిన కీలక సన్నివేశాల షూటింగ్ హైదరాబాద్ పరిసరాల్లో జరుగుతున్నాయి. కిషోర్ తిరుమల దర్శకత్వంలో రూపొందుతున్న సినిమాని సంక్రాంతి 2026 విడుదల లక్ష్యంగా పెట్టుకున్నారు. షెడ్యూల్ వాయిదా పడితే నిర్మాతకు భారీ నష్టం వస్తుందని అర్థం చేసుకున్న రవితేజ, తన బాధను పక్కనబెట్టి సెట్స్‌లో అడుగుపెట్టారు. రవితేజ నిర్ణయం సినీవర్గాలను ఆశ్చర్యంలో ముంచెత్తింది. “ఇది నిజమైన డెడికేషన్‌కి నిలువెత్తు ఉదాహరణ” అని దర్శక నిర్మాతలు ప్రశంసిస్తున్నారు. ‘RT76’ సినిమాలో రవితేజ నూతన, డిఫరెంట్ షేడ్స్‌తో కనిపించనున్నాడు. ఈ సినిమా చివరి దశకు చేరుకుంది. ఈ సినిమాపై రవితేజ చాలా న‌మ్మ‌కం పెట్టుకున్నారు. ఈ సినిమా హిట్ అయితే రవితేజ ఫ్యాన్స్ ఆనందానికి అవ‌ధులు ఉండవంటున్నారు.
