By బాలీవుడ్‌ కమెడియన్‌, నటుడు కపిల్‌ శర్మకు చెందిన కెనడాలోని కేఫ్‌పై ఖలిస్థానీ ఉగ్రవాది కాల్పులు జరిపిన విషయం తెలిసిందే. ఈ ఘటనపై కేఫ్‌ నిర్వాహకులు తాజాగా స్పందించారు. ఈ చర్యను తీవ్రంగా ఖండించారు. ఈ మేరకు కపిల్‌ శర్మకు చెందిన కాప్స్‌ కేఫ్‌ నిర్వాహకులు ఇన్‌స్టా వేదికగా ఓ ప్రకటన విడుదల చేశారు. ‘రుచికరమైన కాఫీ, స్నేహపూర్వకమైన సంభాషణలతో కస్టమర్‌లకు ఆనందాన్ని పంచాలనే ఆశతో ఈ కాప్స్‌ కేఫ్‌ను ప్రారంభించాం. ఇక్కడ హింస సృష్టించడం బాధాకరం. హింసకు వ్యతిరేకంగా దృఢంగా నిలబడతాం. ఏమాత్రం వెనక్కి తగ్గం’ అని పేర్కొన్నారు. ఈసందర్భంగా ఘటన నేపథ్యంలో తమకు మద్దతుగా నిలిచిన శ్రేయోభిలాషులకు కృతజ్ఞతలు తెలిపారు. కెనడా కాలమానం ప్రకారం బుధవారం రాత్రి ఈ ఘటన చోటు చేసుకుంది. కారులో నుంచి తొమ్మిది రౌండ్లు కేఫ్‌పై కాల్పులు జరిపారు. ఇందుకు సంబంధించిన దృశ్యాలు కూడా ప్రస్తుతం వైరల్‌ అవుతున్నాయి. ఈ ఘటనపై పోలీసులు, ఫోరెన్సిక్‌ బృందాలు దర్యాప్తు చేపట్టాయి. కాగా, కెనడాలోని బ్రిటిష్‌ కొలంబియాలో గల సర్రే ప్రాంతంలో ‘కాప్స్‌ కేఫ్‌’ పేరుతో కపిల్‌ శర్మ దీన్ని ఇటీవలే ప్రారంభించారు. ఈ కేఫ్‌ను ప్రారంభించిన కొన్ని రోజుల్లోనే ఈ దాడి జరగడం గమనార్హం. అదృష్టవశాత్తూ ఈ ఘటనలో ఎవరికీ ఎలాంటి గాయాలూ కాలేదు. కేఫ్‌పై కాల్పులకు ఖలిస్థానీ ఉగ్రవాది హర్జిత్‌ సింగ్‌ లడ్డీ బాధ్యత వహించారు. కేఫ్‌పై తానే కాల్పులు జరిపినట్లు ప్రకటించారు.
