By ‘క’ సినిమాతో మంచి హిట్ అందుకున్నారు హీరో కిరణ్‌ అబ్బవరం. ప్రస్తుతం ఆయన ఆసక్తికరమైన సినిమాలతో ముందుకెళ్తున్నారు. కిరణ్‌ నటించిన ‘కె-ర్యాంప్‌’ సినిమా త్వరలో విడుదల కానుంది. మరోవైపు ‘చెన్నై లవ్‌స్టోరీ’ సినిమా చిత్రీకరణలో పాల్గొంటున్నారు కిరణ్‌ అబ్బవరం. ఇంకొన్ని సినిమాలు కూడా లైన్‌లో ఉన్నాయి. మొత్తానికి కిరణ్‌ అబ్బవరం లైనప్‌ భారీగానే ఉందనాలి. ఇదిలావుంటే.. తాజాగా కిరణ్‌ అబ్బవరంకి చెందిన ఓ వార్త సోషల్‌ మీడియాలో వైరల్‌ అవుతోంది. ఆయన త్వరలో స్టార్‌ డైరెక్టర్‌ సుకుమార్‌తో పనిచేయబోతున్నారు. అయితే.. ఈ సినిమా దర్శకుడు సుకుమార్‌ కాదు. ఆయన శిష్యుడు వీర. సుకుమార్‌ రైటింగ్స్‌ పతాకంపై ఈ సినిమా రూపొందనుంది. అంటే.. ఈ సినిమాకు సుకుమార్‌ నిర్మాతగా వ్యవహరిస్తారన్నమాట. మంచి మాస్‌ ఎంటర్‌టైనర్‌గా తెరకెక్కనున్న ఈ సినిమా వచ్చే ఏడాది ప్రారంభంలో మొదలు కానున్నట్టు సమాచారం.
