ర‌ణ్‌వీర్ సింగ్ సినిమాలో హీరోయిన్ ఎవరో తెలుసా..

బాలీవుడ్ న‌టుడు రణ్‌వీర్ సింగ్ ప్ర‌ధాన పాత్ర‌లో న‌టిస్తున్న తాజా సినిమా ‘ధురంధర్’. ఈ సినిమాకు నేష‌న‌ల్ అవార్డు విన్నర్ ఆదిత్య ధర్ ద‌ర్శ‌క‌త్వం వ‌హిస్తున్నాడు. ‘ఉరి: ది సర్జికల్ స్ట్రైక్’  వంటి బ్లాక్‌బస్టర్ సినిమా తర్వాత ఆదిత్య ధర్ దర్శకత్వం వహిస్తున్న రెండవ సినిమా ఇది. దీంతో ఈ సినిమాపై భారీ అంచ‌నాలు ఉన్నాయి. రణ్‌వీర్ సింగ్ ఇందులో గ్యాంగ్‌స్ట‌ర్‌గా క‌నిపించ‌బోతున్న‌ట్లు తెలుస్తోంది. గ‌త ఆదివారం అత‌డి పుట్టిన‌రోజు సంద‌ర్భంగా ‘ధురంధర్’  ఫ‌స్ట్ లుక్ పేరిట టీజ‌ర్‌ను విడుద‌ల చేశారు మేక‌ర్స్. అయితే ఈ టీజ‌ర్‌లో హీరోయిన్‌గా న‌టిస్తున్న అమ్మాయి వైర‌ల్‌గా మారింది. ఇంత‌కీ ఆ అమ్మాయి ఎవ‌రో కాదు. విక్ర‌మ్ న‌టించిన నాన్న సినిమాతో బాల న‌టిగా అంద‌రినీ మెప్పించిన న‌టి సారా అర్జున్. అవును సారా అర్జున్ ‘ధురంధర్’ సినిమాలో హీరోయిన్‌గా న‌టిస్తోంది. నాన్న సినిమాతో బాల‌న‌టిగా మెప్పించిన ఈ అమ్మాయి ఆ త‌ర్వాత ఏకంగా మణిర‌త్నం సినిమాలో ఛాన్స్ కొట్టేసింది. మ‌ణిర‌త్నం ద‌ర్శ‌క‌త్వంలో వ‌చ్చిన పొన్నియ‌న్ సెల్వ‌న్ సినిమాలో జూనియ‌ర్ ఐశ్వ‌ర్య రాయ్ పాత్ర‌ (నందిని)లో మెరిసింది. ఉన్న‌ది కొద్దిసేపే అయినా త‌న న‌ట‌న‌తో ఆకట్టుకుంది. అయితే చాలారోజుల త‌ర్వాత ఈ అమ్మాయి బాలీవుడ్‌లో ట్రెండింగ్‌గా మారింది. పాపులర్‌ బాలీవుడ్ యాక్టర్‌ రాజ్‌ అర్జున్‌ కూతురే ఈ సారా. తెలుగులో రాజేంద్రప్రసాద్‌ ప్రధాన పాత్రలో నటించిన దాగుడు మూత దండాకోర్‌ సినిమాలో కూడా నటించింది ఈ హీరోయిన్.