By టాలీవుడ్ స్టార్ హీరో జూనియర్ ఎన్టీఆర్, ఆయన తల్లిపై తెలుగుదేశం పార్టీ అనంతపురం అర్బన్ ఎమ్మెల్యే ద‌గ్గుపాటి వెంకటేశ్వర ప్రసాద్ చేసిన అసభ్యకర వ్యాఖ్యలు ఎంత క‌ల‌క‌లం సృష్టించాయో ప్ర‌త్యేకంగా చెప్ప‌న‌క్క‌ర్లేదు. ద‌గ్గుపాటికి సంబంధించిన ఆడియో లీక్ కావడంతో, తారక్ అభిమానులు తీవ్ర ఆగ్రహం వ్యక్తం చేస్తున్నారు. సోషల్ మీడియా నుండి న‌డి రోడ్డుపైకి వచ్చిన తారక్ ఫ్యాన్స్ ఆందోళన బాట పట్టారు. ఎమ్మెల్యే ద‌గ్గుపాటి ప్రసాద్‌పై తీవ్రంగా మండిపడుతున్న ఎన్టీఆర్ అభిమానులు, ఆయన బహిరంగ క్షమాపణ చెప్పాలంటూ డిమాండ్ చేస్తున్నారు.
ఇప్పటివరకు నారా, నందమూరి కుటుంబాల నుండి ఎవరూ ఈ అంశంపై స్పందించకపోవడం గమనార్హం. రెండు రోజుల గడువు ఇచ్చినా కూడా, ఎవ‌రి నుండి స్పందన లేకపోవడంతో ఆదివారం అనంతపురం ఎమ్మెల్యే క్యాంపు కార్యాలయాన్ని ముట్టడించడానికి యత్నించారు ఎన్టీఆర్ అభిమానులు. దీనివల్ల అక్కడ ఉద్రిక్తత నెలకొంది. పోలీసులు బారికేడ్లు ఏర్పాటు చేసి, భారీ భద్రతను కల్పించారు. బెంగళూరు, బళ్లారి వంటి ప్రాంతాల నుండి వచ్చిన వందలాది మంది ఎన్టీఆర్ అభిమానులను పోలీసులు అదుపులోకి తీసుకుని స్టేషన్లకు తరలించారు. ఇక ఈ వివాదంపై తాజాగా నారా కుటుంబానికి చెందిన హీరో నారా రోహిత్ స్పందించారు. ఆయన నటించిన ‘సుందరకాండ’ సినిమా ఆగస్ట్ 27న విడుదల కాబోతుండగా, ప్రమోషన్లలో భాగంగా మీడియా సమావేశాల్లో పాల్గొంటున్నారు. ఈ సందర్భంగా ఎన్టీఆర్‌పై ఎమ్మెల్యే చేసిన వ్యాఖ్యల గురించి ప్రశ్నించగా, ఆ ఆడియో గురించి ఎక్కడో చదివాను, కానీ అసలు వినలేదు. ఈ అంశం గురించి నాకు పూర్తి సమాచారం లేదు. ప్రస్తుతం సినిమా ప్రమోషన్లతో బిజీగా ఉన్నాను అని తెలిపారు.
