అజిత్‌కి కార్ రేసింగ్‌ అంటే పిచ్చి, త‌ప్పిన ప్ర‌మాదం..

ఓవైపు సినిమాలు… మరోవైపు కార్ రేసింగ్ కోర్టులో వేగవంతమైన ప్రయాణం… అజిత్ హీరో జీవితం నిజంగా ఓ సాహసగాథ లానే ఉంది. నటుడిగా ఎంతో పేరుతెచ్చుకున్న అజిత్, కార్ రేసర్‌గా కూడా అంతే జోరు మీదున్న సంగతి తెలిసిందే. అంతర్జాతీయ స్థాయిలో అజిత్ తన రేసింగ్ ప్రతిభను చాటుతూ ప్రపంచ వ్యాప్తంగా గుర్తింపు తెచ్చుకున్నాడు. ట్రాక్‌పై అత‌డు చేసే విన్యాసాలు అభిమానుల‌కి కంటి మీద కునుకు లేకుండా చేస్తున్నాయి. 50 ఏళ్లు దాటినా అతడి డ్రైవింగ్ స్పీడ్ ఏ మాత్రం తగ్గడం లేదు. కానీ అదే స్పీడ్ ఎన్నోసార్లు అతడిని ప్రమాదాలకు గురిచేసింది. వానిటీ వ్యాన్‌ల లైఫ్‌కి భిన్నంగా, రిస్క్‌తో కూడిన రేసింగ్ జీవితాన్ని ఎంచుకున్న అజిత్ పలుమార్లు ప్రమాదకరమైన ఘటనలకు లోనయ్యాడు. రేసర్‌గా అనేక విజయాలు సాధిస్తున్నా, ప్రతిసారీ రేస్‌కు వెళ్లినప్పుడు ఫ్యాన్స్ గుండెల్లో టెన్షన్ పెరుగుతూనే ఉంటుంది. ప్రస్తుతం అజిత్ బెల్జియంలోని ప్రఖ్యాత స్పా-ఫ్రాంకోర్‌చాంప్స్ సర్క్యూట్‌లో జీటీ4 యూరోపియన్ సిరీస్ మూడవ రౌండ్‌కు సిద్ధమవుతున్నాడు. కానీ ఈనెల 25న జరిగే ‘క్రౌడ్‌స్ట్రైక్ 24 అవర్స్ ఆఫ్ స్పా 2025’ డ్రైవర్ పరేడ్‌కు హాజరయ్యే ముందు… ఇటలీలోని మిసానోలో మరో ప్రమాదంలో ఇరుక్కున్నాడు. రేస్ 2 సందర్భంగా ట్రాక్‌పై నిలిచిన కారును ఢీకొనడంతో ప్రమాదం జరిగింది. ఈ ఘటనలో అతడికి గాయాలు ఏమీ కాలేదు కాని, రేస్‌కి దూరమవ్వాల్సి వచ్చింది.