By హీరోయిన్ నయనతార డాక్యుమెంటరీ ‘నయనతార: బియాండ్‌ ది ఫెయిరీటేల్‌’కి విడుదలైన నాటి నుండి అడుగడుగునా అవాంతరాలే. విఘ్నేష్ శివన్‌ దర్శకత్వంలో ధనుష్‌ నిర్మించిన ‘నానుమ్‌ రౌడీ దాన్‌’ సినిమాలోని నయనతార సన్నివేశాలను ఈ డాక్యుమెంటరీలో భాగం చేయడంతో కొన్ని నెలల క్రితం నిర్మాత ధనుష్‌ కోర్టును ఆశ్రయించిన విషయం తెలిసిందే. ఆ వేడి ఇప్పుడిప్పుడే చల్లారుతున్న తరుణంలో మళ్లీ అగ్గి రాజేస్తూ.. ‘చంద్రముఖి’ సినిమా కాపీరైట్స్‌ పొందిన ఏబీ ఇంటర్నేషనల్‌ సంస్థ ఈ డాక్యుమెంటరీపై మద్రాసు కోర్టును ఆశ్రయించింది. డాక్యుమెంటరీలో ‘చంద్రముఖి’ సినిమాలోని కొన్ని సన్నివేశాలను ఉపయోగించారని, అందుకు పరిహారంగా 5 కోట్ల రూపాయలు చెల్లించాలని ఏబీ ఇంటర్నేషనల్‌ సంస్థ మద్రాసు హైకోర్టులో పిటిషన్‌ దాఖలు చేసింది. దీనిని సోమవారం విచారించిన కోర్టు.. డాక్యుమెంటరీ నిర్మాణ సంస్థ డార్క్‌ స్టూడియోకీ, అలాగే నెట్‌ఫ్లిక్స్‌కీ రెండు వారాల్లో వివరణ ఇవ్వాలని ఉత్తర్వులు జారీ చేసింది.
