By ‘నా ప్రతీ సినిమాకు పదిమంది ఆడియెన్స్‌ అయినా పెరగాలి. అదే లక్ష్యంతో విభిన్న పాత్రల్ని ఎంచుకుంటున్నా. దక్షిణాది అన్ని భాషల్లో మంచి ఆఫర్లొస్తున్నాయి’ అన్నారు హీరో నవీన్‌చంద్ర. ఆయన నటించిన తాజా సినిమా ‘లెవన్‌’ ఈ నెల 16న ప్రేక్షకుల ముందుకొస్తోంది. ఇన్వెస్టిగేటివ్‌ థ్రిల్లర్‌ ఇది. లోకేష్‌ అజ్ల్స్‌ దర్శకుడు. అజ్మల్‌ఖాన్‌, రేయా హరి నిర్మాతలు. ఈ సందర్భంగా బుధవారం నవీన్‌చంద్ర విలేకరులతో సినిమా విశేషాలను షేర్ చేశారు. తెలుగు, తమిళంలో ద్విభాషా చిత్రంగా రూపొందించామని, తమిళంలో వేసిన ప్రీమియర్‌ షోస్‌కు అద్భుతమైన స్పందన లభించిందని, ప్రేక్షకులు స్టాండింగ్‌ ఒవేషన్‌ ఇచ్చారని ఆయన ఆనందం వ్యక్తం చేశారు. ‘ఇప్పటివరకు ఈ తరహా థ్రిల్లర్‌ రాలేదు. ఇదొక డిఫరెంట్‌ కాన్సెప్ట్‌. ప్రతీ సంఘటనకు లాజిక్‌ ఉంటుంది. కథలోని మలుపులను ఎవరూ ఊహించలేరు. రెండు భాషల్లో డిఫరెంట్‌ షాట్స్‌తో సినిమా తీశాం’ అని నవీన్‌చంద్ర తెలిపారు. ఈ సినిమా తమిళ వెర్షన్‌కు డబ్బింగ్‌ తానే చెప్పానని, దక్షిణాది నాలుగు భాషలతో పాటు హిందీ, మరాఠీ, బెంగాలీ, పంజాబీ భాషల్లో అనర్గళంగా మాట్లాడగలనన్నారు.
